ఆయుష్షూ అర్హతా..

మనిషికి చావంటే ఊహకు తట్టుకోలేనంత భయం… కానీ బ్రతికుండీ ఏం సాధిస్తున్నారో మాత్రం తెలీదు..

పుట్టినప్పటి నుండీ మేజర్ డెస్టినేషన్ చావు వైపే ప్రయాణమే అయినా.. ఎలాగోలా ఆ భగవంతుడు చావు నుండి మనకు మినహాయింపు ఇస్తాడన్న ఆశ… అందరూ పోతున్నా.. కాసేపు భయపడిపోయి.. బలవంతంగా ఆలోచనలు మళ్లించేసుకుని మనుషుల సమూహంలో సేఫ్‌గా ఉండిపోయే ప్రయత్నం..

పదిమంది చుట్టూ చేరితే మనకు చావు గుర్తురాదు.. చావు గురించి భయాలు మర్చిపోతాం.. నాకు తెలిసి ఈ టాపిక్ ఇంతవరకూ చదివే ధైర్యం ఉన్న వాళ్లు కూడా తక్కువే.. అంత భయం మనకు ఇలాంటివి ఆలోచించాలంటే..

ఓకే ఫైన్.. సో భగవంతుడు అద్భుతమైన లైఫే ఇచ్చాడన్నది అర్థమైంది కదా… మనకు బ్రతకాలన్న బలమైన కోరికని గమనిస్తే! సో ఆ అద్భుతమైన లైఫ్ ఏం ఊడబీకుతున్నాం?

తెల్లారిలేస్తే కుట్రలూ, కుతంత్రాలూ, మోసాలూ, వాడుకోవడాలూ, వాడుకుని వదిలేయడాలూ, ఎలాగోలా పెట్టెలు పెట్టెలు కూడబెట్టాలన్న స్వార్థాలూ.. చివరకు నవ్వూ, నడకా, నడతా, అందం, ఆకారం అన్నీ నటనే.. నటించడానికి కాదు కదా ఇంత గొప్ప జీవితం ఉంది?

ఎందుకు పుట్టామో తెలీదు… ఏం సాధించాలనుకుంటున్నామో క్లారిటీ లేదు.. ఏదోలా రోజులు గడిపేస్తే చాలు.. కడుపునిండా తింటే అదే జీవితం.. తూలిపోయేలా తాగితే అదే జీవితం… మెరిసిపోయే వర్క్ శారీస్ కట్టుకుంటే అదే జీవితం… ఖరీదైన కార్లలో తిరిగితే అదే జీవితం.. ఏం కొనాలన్నా డబ్బుకు ఢోకా లేకపోతే అదే జీవితం…. నిజంగా ఇదా జీవితం?

నా లైఫ్‌లో ఫలానా కార్ ఒక్కటి కొంటే చాలు ఇంకేం అవసరం లేదు… అని ఎంతో థ్రిల్లింగ్‌గా చెప్పేస్తుంటారు కొంతమంది. చాలామందికి ఇలాంటివే చిన్నాచితకా కోరికలు ఉండిపోతాయి..

వీటన్నింటి వెనుకా రహస్యం.. ఇలాంటి కోరికలతో జీవితం పట్ల ఆశని నిలబెట్టుకోవడం… మనుషులకు జనాలు ఉండాలి.. జనాలు చూసే గౌరవప్రదమైన చూపులూ, పలకరింపులూ కావాలి… వాటన్నింటి మధ్యా వయస్సునీ, చావునీ మర్చిపోవాలి.. ఈ భూమ్మీదే స్థిరంగా పాతుకుపోతామన్న భ్రమలో ఉండిపోవాలి..

ఒక్కసారి అన్నీ తల్లక్రిందులు అయితే తట్టుకునే మానసిక స్థైర్యం ఎంతమందికి ఉంది?

లైఫ్ ఎప్పుడూ నువ్వు కోరుకున్నట్లు ఉండదు…. ఎప్పుడైనా ఏదైనా జరగొచ్చు…

ఈ జీవితానికి ఏదైనా పర్పస్ ఉండాలీ అంటే నువ్వు సంపాదించుకోవడం, నువ్వు సుఖపడడం కాదు… సుఖపడడంలో తప్పులేదు.. కానీ నువ్వు సుఖం తనివితీరా తీర్చుకునే లోపు జీవితం ముగిసిపోతుంది.. ఇంకా నీ వల్ల ఈ ప్రపంచానికి ఉపయోగమేముంది?

భగవంతుడిని ఆయుష్షు కోసం ప్రార్థించేటప్పుడు.. నీ సుఖం కోసం ఆయుష్షు కోరుకుంటే భగవంతుడు విన్పించుకోడు… సమాజానికి ఏదైనా చెయ్యడం కోసం.. ఈ భూమ్మీద మిగిలి ఉంటే ఏదైనా చేయగలను స్వామీ అని దణ్ణం పెట్టుకో… ఫలితం ఉంటుంది… ఇక్కడ భగవంతుడు ఉన్నాడా లేదా అని డిబేట్లు మనకు అనవసరం.. భగవంతుడు ఉన్నా.. లేదా సూపర్ పవర్ లాంటిదోదో ఉన్నా.. ప్రతీదీ ప్రకృతీ, మనిషీ, సమాజం హార్మోనీని కాపాడే ప్రయత్నంలో అవసరాన్ని బట్టి కొన్ని ప్రాణాలను తీయకా తప్పదు.. కొన్ని ప్రాణాలను కాపాడకా తప్పదు.. అది ఆ సూపర్ పవర్ విద్యుక్త ధర్మం.

అలాగే అర్హతకు మించిన ఆయుష్షు కోరుకోకు… ఒకవేళ అదృష్టం కొద్దీ అది లభించినా… దురదృష్టం కొద్దీ ఆ ఆయుష్షు శక్తీ, సత్తువలు లేకుండా నిష్ర్పయోజనంగానే మిగిలిపోవచ్చు.. క్వాలిటీ ఆఫ్ లైఫ్ ముఖ్యం తప్పించి క్వాంటిటీ ఆఫ్ లైఫ్ కాదు కదా..!!

– నల్లమోతు శ్రీధర్